नाशिक : दिवाळीचा सण तोंडावर आलेला असताना नाशिक जिल्ह्यातील उपजिल्हा रुग्णालये आणि ग्रामीण रुग्णालयांमध्ये कार्यरत असलेल्या सुरक्षा रक्षकांचे ऑगस्ट, सप्टेंबर आणि ऑक्टोबर २०२६ या सलग तीन महिन्यांचे वेतन अद्याप थकीत असल्याचा गंभीर प्रश्न समोर आला आहे. वेतनाअभावी सुरक्षा रक्षकांवर आर्थिक संकट ओढवले असून, त्यांच्या कुटुंबीयांची दिवाळी अंधारात जाण्याची परिस्थिती निर्माण झाली आहे. या पार्श्वभूमीवर प्रत्येक सुरक्षा रक्षकाला प्रत्येकी ३० हजार रुपये आर्थिक उचल देण्याची मागणी क्रांतिकारी सुरक्षा रक्षक संघटनेने सुरक्षा रक्षक मंडळ, नाशिक यांच्याकडे केली आहे.
क्रांतिकारी सुरक्षा रक्षक संघटनेचे प्रदेश उपाध्यक्ष तथा पत्रकार सतिष एस. राठोड यांनी मंडळाचे अध्यक्ष व सचिव यांना लेखी निवेदन देऊन या प्रश्नाकडे तातडीने लक्ष देण्याची मागणी केली आहे.
निवेदनात नमूद केल्यानुसार, जिल्हा रुग्णालयाच्या अखत्यारीतील विविध उपजिल्हा रुग्णालये तसेच ग्रामीण रुग्णालयांमध्ये अनेक सुरक्षा रक्षक अत्यंत प्रामाणिकपणे आपले कर्तव्य बजावत आहेत. रुग्णालयातील रुग्ण, त्यांचे नातेवाईक, वैद्यकीय अधिकारी आणि कर्मचाऱ्यांच्या सुरक्षिततेसाठी हे सुरक्षा रक्षक दिवस-रात्र पहारा देत असतात. मात्र, स्वतःच्या कुटुंबाच्या उदरनिर्वाहाचा प्रश्न त्यांच्यासमोर गंभीर बनला आहे.
ऑगस्ट, सप्टेंबर आणि ऑक्टोबर अशा सलग तीन महिन्यांचे वेतन मिळालेले नसल्यामुळे अनेक सुरक्षा रक्षक कर्जबाजारी झाले आहेत. घरभाडे, किराणा, मुलांचे शिक्षण, औषधोपचार, वीजबिल तसेच बँकेच्या कर्जाचे हप्ते भरताना त्यांना मोठ्या आर्थिक अडचणींचा सामना करावा लागत आहे. काम करूनही वेळेवर मोबदला मिळत नसल्याने सुरक्षा रक्षकांमध्ये नाराजी आणि मानसिक तणावाचे वातावरण निर्माण झाले आहे.
प्रत्येक सुरक्षा रक्षकाला प्रति महिना १० हजार रुपये याप्रमाणे तीन महिन्यांची एकूण ३० हजार रुपये आर्थिक उचल तातडीने मंजूर करून दिवाळीपूर्वी अदा करावी, अशी प्रमुख मागणी संघटनेने केली आहे. तसेच ऑगस्ट, सप्टेंबर आणि ऑक्टोबर महिन्यांचे थकीत वेतन तातडीने वितरित करावे आणि भविष्यात मासिक वेतन कोणत्याही परिस्थितीत विलंब न करता नियमितपणे अदा करण्याची व्यवस्था करावी, अशीही मागणी करण्यात आली आहे.
निवेदनात सुरक्षा रक्षकांच्या कौटुंबिक परिस्थितीचे वास्तव मांडताना म्हटले आहे की, दिवाळी हा प्रत्येक कुटुंबासाठी आनंदाचा, उत्साहाचा आणि मुलांच्या चेहऱ्यावर हसू फुलवण्याचा सण असतो. मात्र, तीन महिन्यांच्या मेहनतीचा मोबदला हातात नसताना आपल्या मुलांना नवीन कपडे कसे घ्यावेत, घरातील खर्च कसा भागवावा आणि कुटुंबासोबत दिवाळीचा आनंद कसा साजरा करावा, असा प्रश्न सुरक्षा रक्षकांसमोर उभा आहे.
"दुसऱ्यांच्या सुरक्षिततेसाठी रात्रंदिवस जागणाऱ्या सुरक्षा रक्षकांच्या स्वतःच्या घरातच आर्थिक अंधार असेल, तर त्यांच्या वेदना समजून घेणे ही मंडळाची सामाजिक आणि मानवी जबाबदारी आहे," अशी भावना निवेदनातून व्यक्त करण्यात आली आहे.
संघटनेने स्पष्ट केले आहे की, ही मागणी कोणत्याही अतिरिक्त लाभासाठी नसून सुरक्षा रक्षकांनी प्रामाणिकपणे केलेल्या कामाच्या मोबदल्याअभावी निर्माण झालेल्या आर्थिक संकटातून त्यांना तात्पुरता दिलासा मिळावा, यासाठी आहे.
"आम्हाला आश्वासन नको, तर आमच्या कष्टाचा योग्य मोबदला आणि संकटाच्या काळात तातडीची आर्थिक मदत हवी आहे," अशी ठाम भूमिका मांडत सुरक्षा रक्षक मंडळाने या निवेदनाची गांभीर्याने दखल घेऊन प्रत्येक सुरक्षा रक्षकाला ३० हजार रुपये आर्थिक उचल देण्याबाबत सकारात्मक व तातडीचा निर्णय घ्यावा, अशी अपेक्षा क्रांतिकारी सुरक्षा रक्षक संघटनेचे प्रदेश उपाध्यक्ष सतिष एस. राठोड यांनी व्यक्त केली आहे.